குவியல்!..(06.05.10)

அன்பு தம்பி சத்யனுக்கு 04.05.10 அன்று பிறந்த நாள், இது அவரது ஆர்குட் தள முகவரி, பெங்களூரில் தொழில்நுட்ப துறையில் இருக்கிறார்! இயந்திர வாழ்க்கை வெறுத்து, விரைவில் தன்னை ஒரு இயற்கை விவசாயியாக காட்டிகொள்ள வேண்டும் என்பதே அவரது விருப்பம், அவரது விருப்பம் நிறைவேற வாழ்த்துவோம்!

********************

பாஸின் திருமண வேலை மற்றும் தொடர்ச்சியான ஆணியால் இந்த மாதம் அவ்வளவாக எழுத முடியாது, உடல்நிலை எதுவும் சரியில்லையா என கேட்கும் நண்பர்களுக்கு நன்றி! உண்மையில் நான் எதுவும் பதிவு போடலங்கறதுக்காக பூமி எதிர் திசையில் சுத்தப்போவதில்லை!, பதிவுகலம் மிகுதியான் போதை கொண்டது, எதையாவது எழுதி ஆகவேண்டும் என்ற வெறி உங்களை வாழ்வில் எதையுமே ரசிக்க விடாது, காணும் விசயங்களிலெல்லாம் பதிவெழுத மேட்டர் கிடைக்குமா என தேடச்சொல்லும், சினிமாவுக்கு போனாலும் படத்தை பார்க்காமல் குறிப்பெடுத்து கொண்டிருப்பீர்கள், எதுவுமே கிடைக்கலையா ”கக்கூஸில் தண்ணி வரல” ரேஞ்சுக்கு ஒரு பதிவு போடத்தோணும்!

பதிவுகலில் நம் சுய எண்ணங்கள், மாற்று கருத்துகள், தேடிய அரிய தகவல்கள் போன்றவற்றை பகிர்ந்து கொள்வது ஆரோக்கியமானது, இதில் சுய எண்ணங்கள் பெரும்பாலும் சுயசொறிதலே வால்பையன் உட்பட, ரொம்ப சொறிஞ்சா நமக்கும் ஆகாது படிக்கிறவங்களுக்கும் ஆகாது, அதற்காக எதுவுமே எழுத வேண்டாம் என்றில்லை, எழுத்து கலை எழுத, எழுத தான் வரும், அது பதிவாகத்தான் இருக்க வேண்டும் என்ற அவசியமில்லை, நண்பர்களின் பதிவுகளில் பின்னூட்டங்களில் விவாதிக்கலாம், பலரது பின்னூட்டங்களை பார்க்கையில் எனக்கு இன்னும் சுருக்க சொல்லுதல், எளிமையாக விளக்குதல் போன்ற கலை கைக்கூடவில்லை என்று தெரிகிறது, அதற்கான பயிற்சி களமாக பின்னூட்ட பெட்டி இருக்கும் என நம்புகிறேன்!

நீங்கள் எனக்கு நண்பர்களாகவே இருங்கள், உங்களுக்கு நீங்களே வாசகர் பட்டம் கொடுத்து என்னை கெடுத்து விடாதீர்கள், தயவுசெய்து உங்களை அறிமுகம் செய்து கொள்ளும் பொழுது எனக்கு வாசகர் என்று சொல்ல வேண்டாம், நண்பனாக இருப்பதே எனக்கு பிடித்திருக்கிறது!


***************************

malena

ஜாக்கிசேகர் பார்த்தே ஆகவேண்டிய படங்கள் என்று ஒரு லிஸ்ட் வைத்திருப்பார், என்னிடம் அப்படி ஒரு லிஸ்ட் கேட்டால் அதில் நிச்சயம் மெலினா இருக்கும், எனக்கு முழுக்கதையும் விமர்சனாக எழுத பிடிக்காததால் எனக்கு அதில் பிடித்தவகளை மட்டும் பகிர்ந்து கொள்கிறேன், முழு விமர்சனம் படிக்க தோழி உமாஷக்தியின் இந்த விமர்சனம் உதவலாம்!

இந்த படம் எனக்கு பிடிக்க எனது பதின்மத்தை ஞாபகபடுத்தியே முதல் காரணம்!, யாராக இருந்தாலும் அந்த கதாபாத்திரத்தில் பொருத்திக் கொள்ளலாம், நமது ஆசைகளும், நிராசைகளும் சற்றே பின்னோக்கி பார்க்க இப்படம் வழி செய்யும்!, உன் மகனுக்கு துஷ்டாஆவி பிடிக்கவில்லை அவன் வயதுக்கு வந்துவிட்டான் எனும் போது எனக்கு என் தந்தையின் ஞாபகமும் வரும், 15 வயதில் செக்ஸை பற்றி பல மணிநேரம் விவாதம் செய்திருக்கிறேன் அவரிடம். போர், போரின் கொடுமைகள், சுயசமாதானங்கள் என்று மெல்லிய நூலிழை போல் படம் முழுவதும் நம்மை அறியாமல் ஒரு சோகம் இழையோடியிருக்கும்! போர் முடிவிற்கு பின் மெலினாவை அந்த ஊர் பெண்கள் அவமானபடுத்தி ஊரை விட்டு துரத்தும் போது, சிரித்து பேசுவதெல்லாம் நம்புவதற்கல்ல, நம் காலும் ஒருநாள் வாரப்படலாம் என்னும் வாழ்க்கை தத்துவம் தெரிகிறது!, நிச்சயமாக இது ஒவ்வொரு பெற்றொரும் பார்க்க வேண்டிய படம், காரணம் நீங்களும் பதின்மத்தை தாண்டி தான் வந்தீர்கள் என்பதை மறந்து விட்டதனால்!

************************

தம்பி பிலால் நேற்று ஈரான் பணம் 2000 த்தை கொண்டு வந்து இதை மாற்ற முடியுமா என்றான், “தம்பி ஏற்கனவே நமக்கும் அவுங்களுக்கும் வாய்க்கா தகராறு” இதை கொண்டு போய் கொடுத்தால் “பொண்ண கைய புடிச்சி இழுத்தியா”ன்னு கேப்பாய்ங்க, அரபு நாடுகளில் இருக்கும் நண்பர்கள் யாராவது மாற்றக்கூடும் என்றேன், அதான் வழியா, இல்லை அப்பணம் மாற்ற வேண்டிய அளவுக்கு மதிப்பில்லாததா, யாராவது தெரிந்தால் சொல்லுங்கள்!


*****************

ஆரம்பத்தில் டுவிட்டரை பற்றி ஒன்றும் தெரியாமல் விலகியே இருந்தேன், இப்போ மொக்கைவிரைட்டர் என்ற பெயருடுன் பயங்கர மொக்கை, எப்படியாவது கார்க்கியை பீட் பண்ணிரனும்!

சில சாம்பிள்ஸ்

காரணமில்லாமல்

ஏற்படும் கோபத்திற்கு

ஒருவர் காரணம்

கேட்கும் போது

ஏற்படும் கோபத்திற்கு

நிச்சயமாக காரணம்

உண்டு!

0*0

வரண்டதொரு பூமியில்

வாழும் மிருகத்தை போல்

உன் நினைவில்லாத பொழுது

என் கண்கள் எரிகிறது!

0*0

ரிங்டோனை மாற்றினேன்,

காதல் தோல்வியா என்கிறான்,

அடிக்கடி ரிங்டோனை

மாற்றும் நண்பனொருவன்.

0*0

”க”டைசியில்

ஆரம்பித்து

முத”ல்”லில்

முடிகிறது

பாரேன் (நம்) காதல்!