கதை சொல்லும் கதை!

என் பெயர் வினோத்! அது உங்களுக்குத் தெரியும்னு எனக்கும் தெரியும், பெரிய எழுத்தாளன்னு இல்லாட்டியும் எதோ எழுதுவேன்!. வெறும் டைரியில தான், ஆனா இப்போ ஒரு சிக்கல் முளைச்சு இருக்கு, அந்த சிக்கலை எப்படி தீக்குறதுன்னு தெரியல, இது என் மானப்பிரச்சனையும் கூட. வேண்டாம்னு தான் முதல்ல நினைச்சேன் ஆனா இப்போ இல்லைனா எப்பவுமே முடியாம போககூடிய சூழ்நிலை உருவாகலாம், அதனால் நான் இந்த போட்டியில கலந்துகிறதா முடிவு பண்ணிட்டேன், அதுக்காக ஒரு கதை எழுதி வச்சிருக்கிறேன் சொல்லட்டுமா!

வேண்டாம் உங்களுக்கு தான் படிக்க தெரியுமே நீங்களே படிச்சிகோங்க!

சுரேஷுக்கு கையும் ஓடவில்லை காலும் ஓடவில்லை, எதோ விளையாட்டாப் பேசபோய் இப்போ ஒரு மாச சம்பளத்துல வந்து நிக்குது பந்தயம், தோத்தா ஒருமாச சம்பளம் போறது மட்டுமில்லாம கூடவே மானமும் போகும், எப்படியாவது ஜெயிச்சாகனும், பெருசா விதிமுறைகள் கூட இல்ல, எந்த பத்திரிக்கையில வந்தாலும் பரவாயில்லைன்னு சொல்லிட்டான், ஆனா வழக்கமான பாணி கதை எழுதி அது திரும்பி வந்துட்டா மேலும் அவமானம், சுரேஷுக்கு தெரியும் இதுக்காக மூளையை கசக்குவதை விட எதாவது ஒரு புள்ளியிலிருந்து ஆரம்பித்தால் கண்டிப்பாக ஒரு வட்டமோ, சதுரமோ கிடைக்கும்.

நீண்ட பெருமூச்சொன்றை விடுத்து பேப்பரில்மளமளவென்று எழுதத்தொடங்கினான்!


சாம்புமாமாவுக்கு ஹைவேசில் வேலை, முப்பது வருட தாம்பத்தியத்தில் ஒரு மாதம் கூட முழுதாக வீடு தங்கியதில்லை, எப்போதும் வேலை வேலை வேலை தான். வீட்டை பொறுத்தவரை அவர் அறிந்தது செண்பகம்மாமி நன்னா வத்தகொழம்பு வைப்பா அம்புட்டு தான்!. விசயத்தை கேள்விபட்ட போது அவருக்கே ஆச்சர்யமா தான் இருந்தது, பின்னே இருக்காதா வீட்டிலே அடைஞ்ச கிடந்த செண்பகம்மாமி ஒரு சிறுகதை எழுத்தாளர்னு தெரியும் போது சாம்புமாவுக்கு ஆச்சர்யமாவும், அதிர்ச்சியாவும். மாமாவுக்கு தெரியாம இத்தனை நாள் மறைச்சதுக்கு ஒரு காரணமும் சொல்லமுடியல மாமியால, வாதம் முத்தி கடைசியில ஒரு வழியாக போட்டியில வந்து நின்னுச்சு, மாமிவோட நினைப்பு கதை எழுதுறதுக்கெல்லாம் தனியா ஒரு திறமை வேணும்னு, மாமா சொல்லிட்டார், “போடி அசடே புதுமைபித்தன் காலத்துலருந்து ஒரு கதை விடாம படிச்சிருக்கேன், இது மாதிரி ஒரு கதைய படிச்சதேயில்லைன்னு சொல்ற மாதிரி ஒரு கதை எழுதுறேன்”னு பேனாவை உதறி நோட்டில் எழுத ஆரம்பித்தார்.

விசுக்கு சந்தோசம் தாள முடியவில்லை, இதுவரை சில சிற்றிதழ்களில் அவனது சிறுகதைகள் வந்துருக்கு, ஒரே ஒரு முறை ஜனரஞ்சக பத்திரிக்கையில் வித்தியாசமான கதைக்காகன்னு பரிசு வாங்கியிருக்கான், ஆனா இது இன்ப அதிர்ச்சி தான், இந்த வருட தீபாவளி மலருக்கு சிறுகதை எழுதி தரணும், ஒருவேளை பிரசுரம் ஆகிட்டா சுளையா பத்தாயிரம் கிடைக்கும், விசுவுக்குன்னு ஒரு தனி பாணி இருக்கு, மற்ற கதைகளை போல காதல்,கத்திரிக்காய் கதையெல்லாம் எழுத மாட்டான், அவனுக்கு தெரியும் அதெல்லாம் ”சரோஜாதேவி” செக்ஸ் கதை மாதிரி தான், முதல் ரெண்டு பத்திய தாண்டிட்டா எல்லாமே ஒண்ணு தான், ஒரு தம்ம உறிஞ்சி இழுத்துட்டு கணிணி முன் அமர்ந்து தட்டச்ச ஆரம்பித்தான்.


என் பெயர் வினோத்! அது உங்களுக்கு தெரியும்னு....

-திரும்பவும் முதல் பாராவுலருந்து படிப்பதும், படிக்காமல் இருப்பதும் உங்கள் பிரியம்


************************************
டிஸ்கி:அண்ணன் பைத்தியகாரன் நடத்தும் சிறுகதை போட்டிக்காக!