கனவுகள் நிறைந்த தூக்கமும் மற்றும் மேட்ரிக்ஸ் படத்தை பற்றி!!

என்னிலிருந்து பிரிக்க முடியாத விசயங்கள் நிறைய இருக்கின்றன.
என் குரல், என் திமிர், என் கோபம் போன்று.
ஆனால் என் கனவுகளை அப்படி என்னால் பார்க்க முடியவில்லை.
அது என்னை போன்று இன்னொரு நானாகவே எனக்கு தெரிகிறது.

என் கனவில் நான் தான் ஹீரோ, ஒவ்வொரு கனவிலும் எதாவது ஒரு வில்லனால் நான் துரத்தபடுவேன்.கனவில் நான் பலகீனமானவனாக தான் இருக்கிறேன், எந்த கனவிலும் நான் வில்லனை ஜெயித்ததில்லை.என் உடல் கண்டந்துண்டமாக வெட்டப்பட்டு நான் கொல்ல பட்டாலும், மறு நாள் என் கனவில் நான் தான் ஹீரோ.

கனவுகளில் என்னால் புரிந்து கொள்ள முடியாதது.
பலகீனம் மற்றும் இயலாமை.

எதிரிகள் துரத்தும் போது நான் எவ்வளவு வேகம் தான் ஓடினாலும் நான் இருந்த இடத்தை விட்டு நகர்ந்ததில்லை, பின்னால் வரும் எதிரிகள் கையில் அகப்பட்டு விடுவேனோ என்ற பயத்தில் சைக்கிள் பின்னால் எல்லாம் ஒளிந்திருக்கிறேன்.
அங்கே ஒளிந்தால் கண்டுபிடித்து விடுவார்கள் என்று நினைத்து கொண்டிருக்கும் போதே அவர்கள் என்னை தாண்டி செல்வது ஆச்சர்யமாய் இருக்கும்.

என் கனவுலகம் என்பது வேறா. அங்கே வேறொரு நான் வாழ்ந்து கொண்டிருக்கிறேனா.
சில நேரங்களில் வரும் கனவுகள் என் வாழ்வில் நடந்தது போல் இருக்கும், ஆனால் நடந்திருக்காது. சில நேரங்களில் சில அதிசிய விலங்குகள் வரும் ஆனால் அப்படியொன்று எங்கேயும் இருக்காது.

ஆனாலும் என் கனவுகள் எனக்கு ஒரு குறியீடாக தான் தெரிகின்றது.
என்னிலிருந்து நான் நிறைய கற்று கொள்வது போல் என் கனவிலிருந்தும் நிறைய கற்று கொண்டு தான் இருக்கிறேன்.

*********************************************

அப்பொழுது நான் சென்னையில் இருந்தேன். எந்த தியேட்டர் என்று ஞாபகம் இல்லை.
ஆனால் என் பக்கத்திலிருந்தவன் கேட்ட கேள்வி என்னால் மறக்க முடியாது.
"மேட்ரிக்ஸ் என்றால் என்ன?"
வடிவேலு ஒரு படத்தில சொல்லுவான் "என்னையும் மதிச்சி ஐந்நூறு ரூபா கேட்டியே" ன்னு!!!
அப்படி தான் என் நிலைமை அப்போ.


படத்திற்கு வருவோம்
நாம் அனைவரும் தூக்கத்தில் இருக்கிறோம், நம் ஒவ்வொருவருக்கும் தனி தனியாக ஒரு மென்பொருள் உள்ளது, இயந்திரங்களின் உதவியுடன் அவைகள் மூலம் நாம் கனவு கண்டு கொண்டிருக்கிறோம். அதையே உண்மையான வாழ்க்கை என்று நம்பி கொண்டிருக்கிறோம்.

ஹீரோ ஒருவனால் மட்டுமே! இயந்திரத்தை ஜெயிக்க முடியும்.
ஆனால் அவன் கனவு வாழ்க்கையையே உண்மையென்று நம்பி கொண்டிருக்கிறான்,
அவனை அது உண்மையில்லை என்று நம்ப வைக்கவேண்டும். உன்னால் இயந்திரத்தை ஜெயிக்க முடியும் என்று நம்பவைக்க வேண்டும்,
இதெல்லாம் நம்ப வைக்க முடியும் என்று கூட இருப்பவர்கள் நம்புவார்கள்.

ஒருவழியாக ஹீரோவை தூக்கத்தில் இருந்து எழுப்பி விடுவார்கள்.
அவனுக்கு கராத்தே மற்றும் பல சித்து வேலைகள் பின் மண்டையில் ஒரு ராடு சொருகி மென்பொருள் மூலம் ஏற்றப்படும்.

இருப்பினும் கனவில் கூட என்னால் முடியும் என்று நம்பும் போது தான் ஹீரோவால் கூட பல விசயங்கள் சாத்தியமாகிறது, பறக்கிறான், பல மீட்டர் மேலிருந்து குதிக்கிறான்.
ஒரே நேரத்தில் பல நூறுபேருடன் சண்டை போடுகிறான்.
கடைசி பாகத்தில் கனவில் அல்ல நினைவிலும் முடியும் என்று நம்பி இயந்திரத்தை கட்டுபடுத்துகிறான்.

நீதி:கனவில் மட்டுமல்ல நினைவிலும் முடியும் என்று நம்பினால் வெற்றி நமக்கே!!
(கடைசியில் ஏன் ஹீரோ செத்தான் என்று கேட்க கூடாது)