மைக்ரோ பைனான்ஸ் = கந்துவட்டி!

சில வருடங்களுக்கு முன் பெட்ரோல் பங்கில் வேலை செய்யும் போது நான் கந்துவட்டிக்கு பணம் வாங்கியிருக்கிறேன், அப்பொழுதெல்லாம் 1000 ருபாய்க்கு 100 தான் எடுத்து கொள்வார்கள், மீதி 900த்தை வாரம் 100 அல்லது தினம் 10 என்ற கணக்கில் மீண்டும் ஆயிரமாக கொடுக்க வேண்டும்! மாதம் 30 வட்டி என்றாலும் 3% தொடர்வட்டியாக தோன்றும், பின்னாளில் ஆயிரத்துக்கு 150 என்று மாறி, தற்பொழுது 250 எடுத்து கொள்வதாக கேள்விபட்டேன். 150 இருக்கும் பொழுது நானும் ஒரு பத்தாயிரத்துடன் களம் இறங்கினேன், அதில் 5000 கூட ஒழுங்காக வசூல் செய்திருக்க மாட்டேன், யாராவது ரொம்ப கஷ்டம்னு புலம்பினால் இருக்கும் போது கொடுங்கன்னு வந்துருவேன். ஒரு படத்தில் கரண், வடிவேலுவை பார்த்து சொல்வது போல் எனக்கு பிஞ்சுமூஞ்சின்னு எல்லாருக்கும் தெரிஞ்சிருக்கு!

ஈரோடு சுத்துவட்டாரத்தில் விசைத்தறி தொழில் தான் பிரசித்தம், தொழில் கற்று கொண்ட ஒருவர் 10000 முன்பணமாக பெற்று ஒரு பட்டறையில் வேலைக்கு சேருவார். வேறு இடம் மாற வேண்டுமென்றால் அந்த முன்பணத்தை திரும்பத் தர வேண்டும், அதை வேறொரு பட்டறை 20000 ஆக கொடுத்து அவரை அங்கே அழைத்துக்கொள்ளும், ஒருவருடம் கழித்து மற்றொரு பட்டறை 30000 கொடுத்து கிட்டதட்ட கொத்தடிமை ஆக்கும், அப்படியே 50000 அவரை அவர்களுக்குத் தரப்படும். அவர்களால் பணம் தரமுடியாமல் போய் அவர்களது உடமைகள் பிடுக்கபட்டு கடைசியில் அவர்களது கிட்னி வரை களவாடபட்டது தமிழகம் அறியும்!

அமெரிக்காவில் இருந்து ஒரு நண்பர் தொடர்பு கொண்டு கல்கத்தாவில் இருந்த கிராமவிடியல் போன்று ஒன்றை தமிழகத்தில் ஆரம்பிக்கலாம் என்றார். சனி,ஞாயிறு விடுமுறை மற்றும் ஏராளமான நண்பர்கள் இருந்த நம்பிக்கையில் நானும் ஒப்பு கொண்டேன், வெளிநாட்டு பணம் இந்தியா வர இருந்த சட்டச்சிக்கலை தீர்க்க பார்த்த ஆடிட்டர் ஒருவரும் எனக்கு சரியாக அமையவில்லை என்பதால் என் தோல்வியை ஒப்பு கொண்டேன், தற்சமயம் அந்த நண்பர் வடமாநிலங்களில் முதலில் ஆரம்பிக்க போவதாக தெரிவித்தார், உதவி செய்யும் நோக்கில் ஆரம்பிக்கப்படும் அம்மாதிரியான மைக்ரோ பைனான்ஸ்கள் நிச்சயம் நலிவடைந்த மக்களுக்கு தேவை, ஆனால் வெறும் வியாபார நோக்கில் மக்கள் பணத்தை உறிஞ்சும் சக்திகள் பற்றி கேள்விபட்ட போது மனம் பதறிவிட்டது.

முதலில் அவர்கள் அணுகுவது மகளிர் குழுவினரை, அவர்கள் ஏற்கனவே பணம் சேர்ந்து வங்கியில் கட்டி அதன் மூலம் ஒவ்வொருவராக கணிசமான தொகையை கடனாக பெற்று பிறகு மாதாமாதம் அடைக்கலாம், வங்கியில் வட்டி மிகவும் குறைவு! ஆனால் வியாபார நோக்கில் வரும் மைக்ரோ பைனான்ஸ்கள் முதலில் முன்பணமாக ஆயிரம் பெறுகிறது, பின் பத்தாயிரம் வழங்க டாக்குமெண்ட்!? சார்ஜ் என்று ஒரு ஐநூறு, வாரம் 300 வீதம் 48 வாரத்திற்கு கட்ட வேண்டும், கொடுமையை பாருங்கள் அதுவே 14400 ஆகிவிட்டது, முன்பணம் திரும்ப வருவதற்கு உத்திரவாதம் இல்லை, டாக்குமெண்ட் சார்ஜ் எதுக்குன்னு தெரியல.

கந்துவட்டிக்கு சமமாக ஏழை மக்கள் பணத்தை கொள்ளையடிக்கும் அந்த நிறுவனங்கள் ஒன்றும் சாதாரணமானதல்ல. உதாரணமாக எங்கள் ஏரியாவில் எல்&டி நிறுவனம் மைக்ரோ பைனான்ஸ் செய்து கொண்டிருக்கிறது, அவர்களுக்கு சம்பாரிக்க வேறு வழியே தெரியவில்லையா என்ன? என் அப்பா ஓட்டும் ஒரு ஓட்டை ஆட்டோவை ரிப்பேர் செய்ய என் அம்மா மூலம் அங்கே பணம் வாங்கி இப்போ தவிடு தின்னு கொண்டிருக்கிறார். எனக்கு தெரியாமல் என் மனைவி பணம் வாங்கி வாராவாரம் என் பாக்கெட்டில் ஆட்டைய போட்டு கொண்டிருக்கிறாள், எதுக்குன்னு விசாரிக்க போய் எனக்கு இந்த விசயமெல்லாம் தெரிந்தது! வீட்டில் இருக்கும் பெண்கள் பணத்தை கையாளுவதில் மிகவும் திறமைசாலிகள் தான், ஆனால் அவர்கள் எடுக்கும் முடிவுகள் எல்லா நேரமும் சரியா அமைவதில்லை என்பதற்கு இந்த மைக்ரோ பைனான்ஸின் அபரித வளர்ச்சி ஒரு உதாரணம், உங்கள் அருகில் அப்படி எதுவும் இருந்தால் முதலில் அதிலுள்ள சிக்கலை பற்றி விழிப்புணர்வு ஏற்படுத்துங்கள், நான் சென்ற வாரமே ஆரம்பித்துவிட்டேன்!