அறிவை வளர்க்க ஒரு திருவிழா!

படிக்கும் காலத்திலேயே ஆங்கில புத்தகம் தவிர மற்ற புத்தகங்கள் அனைத்தின் மீதும் எனக்கு பற்று அதிகம், புத்தகம் வாங்கியவுடம் முதலில் தமிழ் உரைநடையில் இருக்கும் உரையாடல் வடிவ பாடம், அறிவியலில் இயற்பியல் தவிர்த்து இரண்டு பாடங்களும் படித்து விடுவேன். வரலாறு, புவியியல் சொல்லவே வேண்டியதில்லை அப்படியே முன்னாடியே கொஞ்சம் படிப்பதனால் என்னால் நல்ல மதிப்பெண்கள் படிக்கும் வரை எடுக்க முடிந்தது, ஆங்கிலம் மட்டுமே கொஞ்சம் கசப்பான பாடம், அதையும் தமிழில் எழுதி வைத்து படித்தாவது தேர்ச்சி அடைந்து விடுவேன்!

இதுவல்லாது புத்தகத்தின் மீது மேலும் ஆசையை தூண்ட வைத்ததது அம்புலிமாமா, பூந்தளிர், சிறுவர்மலர்!. ஒன்பதாவதுடன் படிப்பை நிறுத்திய பிறகு வேலைக்கு போனேன், அங்கே வந்த வருமானம் லயன் காமிக்ஸ், முத்து காமிக்ஸ் என அடுத்த கட்ட வாசகத்துக்கு மாற்றியது, ஆனந்தவிகடன், குமுதத்தில் இருந்த ஒரு பக்க கதைகள், சிறுகதைகள் படிக்கும் ஆர்வத்தை தூண்டியது, கிரைம்நாவலில் ஆரம்பித்து ராஜேஸ்குமார், பி.கே.பி, சுபா என பயணித்து பாலகுமாரன், சுஜாதா என நிறுத்தியது! சுஜாதா பாதித்த அளவு பாலகுமாரன் பாதிக்கவில்லை, சிறுவயதில் இருந்தே நாத்திகன் என்பது காரணமாக இருக்கலாம்!

புத்தக வடிவில் இல்லாவிட்டாலும், என்னை follow செய்யும் நண்பர்களின் ப்லாக்கை நான் follow செய்து படித்து வருகிறேன்!, வீட்டில் கிடைக்கும் நேரங்களில் பத்து பத்து பக்கமாக எதாவது ஒரு புத்தகம் வாசிக்கபட்டு தான் வருகிறது, ஆனாலும் நண்பர்களின் வாசிப்பனுபவம் முன்னால் நானெல்லாம் தூசிக்கு தான் சமம்! சக வலைப்பதிவர் லேகா, புத்த்கத்திலேயே விழித்து, புத்தகத்திலேயே உண்டு, புத்தகத்திலேயே உறங்கி புத்தகத்திலேயே வாழ்பவர். ஜ்வோய்ராம் சுந்தர், செல்வேந்திரன், வெயிலான், வடகரைவேலன், பரிசல், கும்க்கி என நான் பார்த்து ஆச்சர்யபடும் புத்தகப்புழுக்கள் நிறைய! என்னை முதன் முறை பார்க்க வந்தது போது கும்க்கி ஒரு மூட்டை நிறைய புத்தகம் கொண்டு வந்தார்! என் மூஞ்சை பார்த்து என்ன நினைத்தாரோ தெரியவில்லை, ஒரு புத்தகம் கூட தரவில்லை!

சுயசொறிதல் போதும்!, ஆனாலும் எதுக்கு இதுன்னு சொல்லனும்ல, எனக்கு கொஞ்சமேனும் அறிவு இருக்குன்னு யாராவது நம்பக்கூடும் எனில் அது அனைத்தும் புத்தகத்தின் ஆரம்பக்கட்ட உந்துதல் தான்!(நான் புத்தகத்தை மட்டுமே நம்புவதில்லை)

எங்கள் ஊரில் இந்த வருட புத்தகதிருவிழா ஆரம்பிக்க இருக்கிறது! வழக்கம் போலவே ஆர்வமுள்ள மற்றும் இனிமேல் ஆர்வம் பொங்க போகிற நண்பர்கள் மறக்காமல் வந்து பயனடைய வேண்டும் என்பது எங்கள் ஆசை!, உங்கள் வாரிசுகளுக்கு நீங்கள் சேர்த்து வைக்கும் பொருளாதார செல்வங்கள் மதிப்பிழந்து போய்விடலாம், அறிவு செல்வம் என்றும் அழியாதது!, உங்கள் வருகையை ஆவலுடன் எதிர்பார்த்து ஈரோடு வலைப்பதிவர் நண்பர்கள்!


சிறப்பு அழைப்பாளர்கள்(பேச்சாளர்கள்) பற்றி அறிய!


கடைகள் இருக்கும் இடம் மற்றும் அதன் உரிமையாளர்கள் பற்றி அறிய
(கடை எண்ணில் மவுஸை வைத்தால் உரிமையாளர் பெயர் தெரியும்)


குழுமமாக வர இருக்கும் நண்பர்கள் முன்கூட்டியே தகவல் கொடுத்தால் ”தங்க” அறை வசதி ஏற்பாடு செய்து வைக்க ஏதுவாக இருக்கும்!