பெண்கள் தினம்!

இருபதாம் நூற்றாண்டின் துவக்கத்திலேயே பெண் தனக்கான பேச்சை பேசத் துவங்கிவிட்டாள். அதற்குமுன் அவ்வாறு பேசி இருந்தால் அது ஒரு பெரும் குற்றமாக கருதப்பட்டது.

அந்த நிலையில் இருந்து மாறி ஆணுக்கு சரி நிகர் பெண்கள் என்ற நிலை வந்துவிட்டது. பெண்கள் இன்று ஒரு பெரிய இமயம் போல் வளர்ந்து நிற்கின்றார்கள் என்றால் அது மிகையாகா.

பொதுவாக பெண்களை பற்றி நினைக்கும் போதே முதலில் ஒவ்வொருவர் நினைவிலும் வருவது, பெண்கள் என்றால் மென்மையானவர்கள், வலிமையற்றவர்கள் என்பதுதான்.

அந்த எண்ணத்தை புரட்டிப் போடவே நம் பெண்கள் செய்த பல வேலைகள் அனைவரின் கவனத்தையும் திசை திருப்புவதாக அமைந்தது.

பாரதி கண்டப் புதுமைப் பெண்களாம் இவர்கள்....

தலையில் கலவையை தூக்கி அதில் கிடைத்த வருமானத்தின் உதவியுடன் குடும்பத்தை ஆளாக்குபவளும் பெண்ணே!

தலைக்கு மேலே ஓடும் விமானத்தை ஒட்டி சகாப்தம் படைத்தவுளும் பெண்ணே!

இப்படி எல்லா துறைகளிலும் பல சாதனைகளை பெண்கள் செய்து முத்திரைகள் பதித்திருக்கின்றனர்.

முதலில் நமக்கு முன்னே நிற்கும் கேள்விகள்: பெண் சுதந்திரம் என்றால் என்ன?

கண்டிப்பாகப் பெண் சுதந்திரம் என்பது ஆண்/பெண் இருவரிடமும் உள்ளது...

கல்வி செல்வத்தை கொடுத்து சமுதாய அந்தஸ்த்தை உயர்த்திக் கொள்ள தந்தை முதல் விதை விதைக்கிறார். அதில் ஆரம்பிக்கிறது ஒரு பெண்ணின் போராட்டம்.

கிடைத்த கல்விச் செல்வத்தை பயன் படுத்த கையில் எடுக்கும் ஆயுதம்தான் வேலைக்கு செல்லுதல். இன்றைய கால கட்டத்தில் இது ஒரு நிர்ப்பந்தமாகிப் போனது என்பது உணமையான உண்மை.

திருமண வாழ்க்கையானாலும் சரி, தனிமையில் வாழ்வதானாலும் சரி, ஒரு பெண்ணிற்கு மிகவும் சவாலாக அமைவது அவளின் எதிர் கொள்ளும் திறனே!

வெற்றியானாலும் சரி, தோல்வியானாலும் சரி, அதை எடுத்துக் கொள்ளும் முறைதான் அவளை செம்மைப் படுத்துகிறது.

பண்பாடு, கலாச்சாரம், நாகரீகம் போன்றவற்றை மீறுவதுதான் பெண் சுதந்திரம் என்று எண்ணாமல், இவற்றுள் தானும் அடக்கம் என்று தனது மனதை பக்குவப் படுத்திக் கொள்ளுதலும் ஒரு பெண்ணின் மேன்மையான எண்ணத்தை வெளிச்சம் காட்டும் திறன் உள்ளது.

ஆணின் கையிலா பெண் சுதந்திரம்? பெண் எடுத்துக் கொள்வதிலா பெண் சுதந்திரம்? பெண்ணே பெண்ணின் சுதந்திரத்தை தடுப்பதிலா பெண் சுதந்திரம்? இல்லை சுதந்திரம் என்பது நம்மிடம்தான் (பெண்களிடம்தான்) உள்ளது என்பது எனது தாழ்மையான கருத்து.

எத்தனை கஷ்டங்கள் வந்தாலும் நமக்கென்று ஒரு எல்லைக் கோட்டை விதித்துக் கொண்டு வாழ்க்கையை நடத்துபவளே சுதந்திரமான பெண் எனபது என் தரப்பு வாதம். தன்னைச் சுற்றி ஒரு சக்கர வளையத்தை ஏற்ப்படுத்திக் கொண்டு தனக்கு தேவை இல்லாதவைகளை வளையத்திற்குள் இருந்து வேடிக்கை பார்க்க வேண்டும்.

சுதந்திரம் வெளியே இல்லை. பெண்ணாகிய உனக்குள்ளேதான் ஒளிந்து கொண்டிருக்கிறது. அதை தேடித் பிடித்து சாதகமாக மட்டுமின்றி, சமுதாய கண்ணோட்டத்திற்கும் ஏதுவாகப் பயன் படுத்தினால் ஒரு பெண்ணின் சுதந்திரம் - அது அவளுக்குக் கொடுக்கும் மதிப்பும் மரியாதையும் - இமயத்துக்கு உயராதோ?

பெண் ஒரு உண்மையான பெண்ணாக இருக்க சுதந்திரம் இல்லையென்றால் ஆணுக்கும் அதே நிலைதான். இதை உணர புரிதல் மிகவும் அவசியம். ஆமாம் நம் நிலையை முதலில் நாம் புரிந்து கொள்ளவேண்டும் என்ற எண்ணங்கள் ஒவ்வொரு பெண்ணிற்கும் மிகவும் அவசியம். பெண்களுக்கு விரோதி வெளியே இருந்து வருவதில்லை. ஒரு இக்கட்டான கால கட்டத்தில் அவளே அவளுக்கு விரோதியாகிறாள். அவசரம், விரக்தி தரும் வேதனை இவைகள் அவளின் யோசித்து முடிவெடுத்தல் என்ற ஆற்றலை விழுங்கி விடுகிறது.

அதே போல் சில சமூகத்தில் பெண்கள் பற்றிய, அவர்கள் மீது செலுத்தப்படும் வன்முறை பற்றிய, உரிமை மறுப்புப் பற்றிய விடயங்கள் கணக்கிலடங்கா. இது அங்கொன்றும் இங்கொன்றுமாக இன்றுவரை அரங்கேறியும் வருகின்றது. இவற்றில் இருந்து மீண்டு வந்து தனெக்கென ஒரு வாழ்வை - மகிழ்ச்சி மிக்க வாழ்வை - அமைத்துக் கொள்பவளே பாரதி கண்ட கனவுலக நாயகியாவாள்!

வேண்டாத மருமகள், அப்பாவிப் பெண்களுக்கு நடக்கும் கொடுமைகள், இவை அனைத்தும் இன்றும் நடந்து கொண்டிருக்கிறது என்பது அனைவரும் அறிந்த உண்மை. இது போன்ற அப்பாவி பெண்களுக்கு "பெண்கள் பாதுகாப்பு சட்டங்கள்" பற்றிய விழிப்புணர்ச்சி கண்டிப்பாக ஏற்படுத்த எல்லோரும் முன் வரவேண்டும் என்பது எனது தாழ்மையான வேண்டுகோள்.

பாதிக்கப் பட்ட பெண்கள் எல்லாம் முடிந்து விட்டது என்ற முடிவிற்கு வந்துவிட்டால்? அந்த எண்ணங்கள் மட்டுமே போதும் அவளை ஒரு மூலையில் உட்கார வைத்துவிடும். நெருங்கிய சொந்தங்களுக்கு மட்டுமில்லாமல் அவளுக்கே அவள் பாரமாகிப் போய் விடுவாள். எத்தனை முறை வீழ்ந்தாலும் அது தனக்கு ஏற்பட்ட வீழ்ச்சி என்று கருதாமல் அடுத்து எந்த செயல் நமக்கு மன அமைதி கிடைக்கும் என்ற முதல் யோசனையை முன் வைத்து, மெதுவாக முன்னேறி, அதில் ஒரு இலக்கு நிர்ணயம் செய்து கொள்ள வேண்டும்.

ஒவ்வொரு நிகழ்வுகள் கொடுக்கும் எரிச்சல், வேதனை, கோபம் இவைகளை மூலதனமாக வைத்து எடுக்கும் முடிவை திடமாகப் பிடித்துக் கொண்டு மெதுவாக, மிக மெதுவாக முன்னேற்றம் அடைய எண்ணங்களை செலவாக்கினால்; வெற்றி என்ற இலக்கை அடைந்து, வேடிக்கை பார்த்தவர்களை வேண்டிப் பார்க்க வைக்க கண்டிப்பாக முடியும் என்பதில் சிறிதளவும் ஐயமில்லை.

வாழ்வை வெறுத்தாலோ, வெறுக்கப்பட்டாலோ அதில் அமிழ்ந்து விடாமல் மீண்டும் மீண்டும் பிறவி எடுத்து புதுப் புது வேள்விகளை செய்ய தயாராக இருப்பவளே பாரதி கண்ட புதுமைபெண்! சோகம் என்ற சூறாவளியால் சுருண்டு போகாமல் எதையும் என்னால் சாதிக்க முடியும் என்ற திறன் ஒன்றே போதும் உன்னை இமயம் வரை உயர்த்துமே!

சோர்வை போர்வையாக்கிக் கொள்ளாமல் வேதனை என்ற அரக்கனை விரட்டும் மதுரம் தடவிய எண்ணங்கள் புதுப் பொலிவினைத் தரும் என்பதில் எள்ளளவும் சந்தேகமில்லை.

தொடர் துன்பங்கள் தீண்டிய போதும் நீ ஒரு தூரிகை தீண்டிய ஓவியம் போலல்லாமல் துன்பங்களை வெல்லும் ஆற்றல் படைத்த பெண்ணாக உயரும் மனம் உன்னிடம் தான் உள்ளது. அந்த திறன் மிக்க ஆற்றலை கையில் எடுத்தால் வெற்றிக்கனி மிக அருகில் பெண்ணே!

இரண்டு கைகளிலும் மிகச் சிறந்த கை தன்னம்பிக்கை. தன்னம்பிக்கையை முதல் மூலதனமாக் கொண்டால் போராட்டத்தின் வீரியம் சற்றே குறைய வாய்ப்பு உள்ளது. உனக்குள் இருக்கும் நம்பிக்கை என்ற ஆசானைக் கொண்டு, நீ நடந்து செல்லும் பாதைகளை மலர்ப் பாதைகளாக்கி, ஒவ்வொரு கசப்பான நிகழ்வுகளும் உனக்குள் மைல் கற்களாக உருவெடுக்க, உனக்கு நீயே வெற்றிக் கனிகளை பெற்று வாழ்வாங்கு வாழ வழி வகுத்துக்கொள் பெண்ணே!!

பூமித்தாயை உனது கால்கள் முத்தமிட்டு நடக்கும் நடையில் நீ ஒரு ஜான்சி ராணி! நிமிர்ந்தால் நீதான் இமயம்! ஓடினால் நீதான் காட்டாறு! வீசினால் நீதான் தென்றல்! எழுந்தால் நீதான் ஆர்பரிக்கும் கடலலை!

இத்தனை மகிமைகளைப் பெற்ற நீ, வானத்தில் ஒளிரும் வால் நட்சத்திரமாக திகழ உன்னால் முடியும் என்ற உறுதியினை உன் மனதில் சிம்மாசனமிட்டு அமரச் செய்தால் உன்னை வெல்ல இப்பூவுலகில் யாரோ!!


உங்கள் ரம்யா!!


********************
எழுதி, நமது வலைப்பூவில் வெளியிட சம்மதமும் அனுப்பி நமக்கு இந்த வாய்ப்பளித்த ரம்யாவுக்கு நன்றி