ஐஸ்கிரீமை வறுத்து சாப்பிடலாம் வாங்க!

நிஜமாலும்,மெய்யாலும், சத்தியமாலும் இது சீரியஸான பதிவு தான்!

**********************
தற்சமயம் வருத்தபடாத வாலிபர் சங்கத்துல எழுதிகிட்டு இருக்கேன்! இந்த ஒரு மாசம் முழுவதும் அங்கே எழுதனும், அதனால இங்க எழுதுறது குறைவா தான் இருக்கும்!(இல்லாட்டி மட்டும் எழுதி தள்ளிருவனாக்கும்), முதல் முறை வித்தியாசமா சமையல் குறிப்பு! எப்படியிருக்குன்னு செஞ்சு சாப்பிட்டு பார்த்து சொல்லுங்க!(கொஞ்சம் வால்தனமா தான் இருக்கும்)

திரும்பவும் சொல்றேன் இது சீரியஸ் மேட்டர்!

தேவையான பொருள்கள்!

தக்கணூண்டு மைதா மாவு!
தக்கணூண்டு கார்ன்ப்ளவர்!

கண்டிப்பா ஐஸ்கீரிம் வேணும்!

அப்புறம் பிரட்ஸ்கிரம்ஸ் ரொம்ப முக்கியம், பேக்கரியில கேட்டாலே கிடைக்கும், இல்லைனா பிரட்டை காய வச்சு உதுர்த்துக்கலாம்!

உப்பு, மொளகாபொடியெலெல்லாம் உங்க வீட்ல இருக்குல்ல, ரைட்டு அதெல்லாம் பத்திரமா அங்கேயே இருக்கட்டும், நமக்கு அதெல்லாம் தேவைப்படாது!

முதல்ல அடுப்ப பத்த வச்சுகோங்க, பச்சதண்ணி மாதிரி இருக்குற எண்ணையில இத செஞ்சா எண்ணை மொத்தமும் வேஸ்டா போயிரும், அதுனால நல்லா சூடா இருக்கனும்!

இப்போ செய்முறை, மைதாவையும், கார்ன்ப்ளவரையும் தக்கணூண்டு தண்ணி விட்டு பசை மாதிரி கலக்கனும், ஐஸ்கிரிமை எடுத்து உருட்டி எல்லா பக்கமும் அந்த பேஸ்ட் படுறாமாதிரி பண்ணனும், ரொம்ப வேகமா பண்ணனும், உங்களால முடியலைனா ரங்கமணிகளை செய்ய சொல்லுங்க! புயல் மாதிரி செயல்படுவாங்க!

இப்போ அப்படியே எடுத்து பிரட்ஸ்கிரம்ஸ்ல உருட்டனும், எல்லா பக்கமும் படுறாமாதிரி, அப்போ தான் ஐஸ்கிரீம் எண்னையில படாம இருக்கும், இப்போ அப்படியே எடுத்து கொதிக்கிற எண்னையில போடனும், ஒண்ணரை நிமிசத்துகுள்ள எடுத்துறனும், அதுக்கு மேல இருந்தா ஏழரை ஆயிரும்! உடனே எடுத்து பரிமாறிரனும், இல்லைனா உருகி போன ஐஸ்கீரிம் தான் மிஞ்சும்!

*********************

இதை செஞ்சு பாருங்க, பிடிச்சிருந்தா (மட்டும்) உங்க பதிவுல போட்டுக்கலாம், கொஞ்சம் உங்க எழுத்து நடைக்கு மாத்திகோங்க!